Aldís Ásta Heimisdóttir og Jóhanna Margrét Sigurðardóttir og félagar þeirra í Skara HF tryggðu sér framhald í einvíginu við Höörs HK H 65 í átta liða úrslitum sænsku úrvalsdeildarinnar. Skara vann aðra viðureign liðanna á heimavelli í dag, 29:27, eftir að hafa verið undir í hálfleik, 14:12.
Vinna þarf þrjá leiki til þess að öðlast sæti í undanúrslitum.
Skaraliðið lék frábærlega í síðari hálfleik, jafnt í vörn sem sókn. Næsti leikur verður í Höör sunnudaginn eftir hálfan mánuð. Hlé verður gert á úrslitakeppninni vegna landsleikja á næstu dögum.
Aldís Ásta skoraði sex mörk fyrir Skara og var næst markahæst. Einnig átti hún þrjár stoðsendingar. Aldís Ásta hlýtur mikið lof fyrir að hafa stýrt sóknarleik Skara af röggsemi.
Jóhanna Margrét skoraði tvö mörk og átti þrjár stoðsendingar.
Höör-liðið hafnaði í öðru sæti deildarinnar en Skara varð í sjöunda sæti. Fyrsta leik liðanna lauk með sigri Höörs, 27:21.
