Aldís Ásta Heimisdóttir átti stórleik í kvöld þegar lið hennar og Jóhönnu Margrétar Sigurðardóttur, Skara HF, gerði sér lítið fyrir og vann H65 Höör, 25:20, í oddaleik í átta liða úrslitum sænsku úrvalsdeildarinnar í kvöld. Leikurinn fór fram í Höör. Skara HF, sem hafnaði í sjötta sæti deildarinnar, er þar með komið í undanúrslit og mætir þar meisturum síðasta árs, Sävehof. Tapið er áfall fyrir H65 Höör sem hreppti þriðja sæti úrvalsdeildarinnar í vetur.
Aldís Ásta fór á kostum eins og áður sagði. Hún skoraði sjö mörk og átti nokkrar stoðsendingar. Hún var markahæst hjá Skara-liðinu sem fékk öfluga sveit stuðningsmanna með sér í norðurferðina í dag.
Jóhanna Margrét Sigurðardóttir skoraði tvö mörk. Því miður hefur tölfræði leiksins ekki uppfærst enn sem komið er á heimasíðu sænska handknattleikssambandsins.
Isabella Mouratidou markvörður Skara var valin maður leiksins. Hún fylgdi eftir stórleik á laugardaginn með því að fara hamförum í kvöld með 50% hlutfallsmarkvörslu.
Berta Rut er úr leik
Berta Rut Harðardóttir og félagar í Kristianstad HK féllu úr leik í átta liða úrslitum í kvöld. Kristianstad tapaði fyrir Önnereds á heimavelli, 30:26, í fjórðu viðureign liðanna. Önnereds vann þar með þrjá leiki en Kristianstad einn.
Vopnin snerust í höndum Kristianstad í leiknum. Liðið var með þriggja marka forskot í hálfleik, 17:14.
Berta Rut skoraði ekki mark að þessu sinni.
