Athygli hefur vakið að skömmu fyrir leiki þýska landsliðsins í handknattleik á Evrópumótinu í handknattleik karla þá hefur Alfreð Gíslason landsliðsþjálfari Þýskalands sést þefa af handarbaki sínu eftir að hafa hitt liðsstjórann skömmu áður en flautað er til leiks. Ekki er um að ræða íslenskt neftóbak eins og afi notaði heldur japanska piparmyntuolíu sem hreinsar öndunarveginn. Þessa olíu mun vera hægt að fá í apótekum í Þýskalandi eftir því sem þýskir fjölmiðla segja frá.
Þýska blaðið Bild fékk svar við fyrirspurn sinni um hvað það væri sem Alfreð þjálfari þefaði af skömmu fyrir leiki en hann hefur sést nudda nefinu ofan í annað handarbakið eftir að hafa hitt liðsstjóra sinn.
Fram kemur í frétt Bild að talsmaður þýska landsliðsins segir efnið vera í tísku um þessar mundir og að nokkrir leikmenn þýska landsliðsins þefi einnig af piparmyntuolíunni til að hreinsa önduravegin skömmu fyrir leiki. Einnig hressir efnið menn upp finni þeir til þreytu.
Minnir efnið á Vicks sem fékkst í staukum hér á Íslandi fyrir mörgum árum og fólk þefaði ef það kvefaðist illa. Átti Vick-sið, sem var með mentholilmi, að losa um stíflur í nefi.
Þessi frásögn varð til þess að TV2 í Danmörku rifjaði upp að fyrir nokkrum árum gekk hinn litríki rússneski handknattleiksþjálfari, Evgeny Trefilov, ævinlega með lítið glas af ammoníaki á sér og átti til að reka nefið nánast ofan í glasið til þess að hressa sig á þegar þreyta sótti á.
