Útilokað virðist að íslenska landsliðið í handknattleik karla leiki í Laugardalshöll í vor ef til þess kemur að það leiki í umspili um sæti fyrir heimsmeistaramótið. Lagfæringar og endurbætur á Laugardalshöll eftir vatnsleka sem þar varð í byrjun nóvember í fyrra þegar heitavatnsrör sprakk hafa gengið á afturlöppunum, svo ekki sé tekið dýpra í árinni.
Samkvæmt frétt mbl.is í gær reyndust öll tilboð í raflögn og viðburðabúnað svo há að þeim var á dögunum öllum hafnað. Næst á dagskrá er nýtt útboð í von um að viðunandi tilboð.
Þetta eru ekki einu vandræðin sem hafa tafið verkið því útboð á uppfestibúnaði lýsingar var kært. Af þeim sökum varð m.a. að fresta lagningu parkets á gólfið í keppnissalnum.
Vonir stóðu til þegar vatnslekinn varð í nóvember í fyrra að Laugardalshöll yrði tilbúin til þess að taka á móti kappleikjum sumarið 2021. Fljótlega kom í ljós að þar var um bjartsýni að ræða. Eitt virðist þó liggja fyrir að með öllu er óvíst hvenær eina keppnishús landsins sem er á undanþágu ofan á undanþágu hjá alþjóða samböndum handknattleiks og körfuknattleiksfólks verður opnað fyrir æfingar og keppni á nýjan leik. E.t.v. verður ný keppnishöll tilbúin áður en viðgerðum verður lokið.
