Búist er við að síðar í dag verði tilkynnt að Handknattleikssamband Danmerkur, DHF, verði gestgjafi Evrópumóts kvenna sem hefst 3. desember. TV2 í Danmörku segir að verið sé að hnýta allra síðustu endana og von sé á yfirlýsingu hjá Handknattleikssambandi Evrópu, EHF, og DHF síðdegis.
Séð muni vera fyrir endann á þeim fjárhagslegu skuldbingum sem fylgja yfirtöku Dana á þeim hluta mótsins sem átti að fara fram í Noregi. Það er um 60% af fyrirhuguðum leikjum. EHF mun borga brúsann sem hleypur á milljónum danskra króna. Einnig er talið fullvíst að Handknattleikssamband Noregs leggi eitthvað í púkkið eftir að hafa gengið úr skaftinu á elleftu stundu.
Starfmenn eru tilbúnir
Einnig mun vera búið að ráða fjölmennan hóp fólks til ýmissa starfa við mótahaldið, aðallega í sjálfboðavinnu. Launaðir jafnt sem ólaunaðir starfsmenn verða að sæta ströngum reglum um sóttvarnir.
Kolding í stað Þrándheims
Leikir riðlakeppninnar sem fram áttu að fara í Þrándheimi flytjast til Kolding á Jótlandi. Milliriðlaleikir, undanúrslit og úrslitaleikir fara fram í Herning á Jótlandi. Ekki er langt á milli Herning og Kolding. Lokið hefur verið við samninga við hótel á Jótlandi um gistingu fyrir leikmenn og fylgdarfólk en allir munu búa nánast í einangrun á milli æfinga og leikja.
Reynsla og þekking fyrir hendi
Danska handknattleikssambandið nýtur þess að innan þess er fyrir hendi mikil reynsla við skipulagningu stórmóta sem nýtist vel við þessar aðstæður. Á síðasta áratug hafa Danir nokkrum sinnum verið gestgjafar heims, – og Evrópumóta karla og kvenna.
