„ÍR-liðið er ólseigt og ég er þar af leiðandi ánægð með að okkur tókst að klóra okkur í gegnum þennan leik og vinna bæði stigin,“ sagði Þórey Rósa Stefánsdóttir leikmaður Fram eftir eins marks sigur á ÍR í baráttuleik í 16. umferð Olísdeildar kvenna í handknattleik í Úlfarsárdal í kvöld, 24:23. Ethel Gyða Bjarnasen varði síðasta markskot ÍR á lokasekúndum leiksins og sá þar með til þess að Fram hirti bæði stigin í viðureign þar sem ÍR-ingar verðskulduðu annað stigið.
Matthildur og Sylvía voru úr leik
Eftir jafna stöðu í hálfleik, 11:11, þá náði Fram frumkvæðinu í upphafi síðari hálfleiks og hafði þriggja marka forskot um miðjan hálfleikinn. ÍR-ingar voru ekki á því að leggja árar í bát þótt bæði Matthildur Lilja Jónsdóttir og Sylvía Sigríður Jónsdóttir yrðu frá að hverfa vegna veikinda og meiðsla. Áfram var barist og staðan jöfnuð.
Kristrún Steinþórsdóttir kom Fram tveimur mörkum yfir, 24:22, þegar þrjár mínútur voru eftir. ÍR-inga minnkuðu metin í eitt mark. Framarar töpuðu boltanum þegar hálf mínúta var eftir. ÍR átti síðustu sóknina og reyndi án árangurs að jafna metin.
Verðum að bæta okkur
„Ég er hrikalega ánægð með að okkur tókst að standast síðasta áhlaup ÍR-inga. Við höfum gott að því að venjast spennuleikjum fyrir komandi átök, vonandi. Við verðum að bæta í ef við ætlum ekki að misstíga okkur á lokametrunum í deildinni. Nú þenjum við seglin og hefjum okkur til flugs,“ sagði Þórey Rósa Stefánsdóttir leikmaður Fram í samtali við handbolta.is í Úlfarársdal í kvöld.
Lena og Sara Dögg handarbrotnar
Skarð var einnig fyrir skildi hjá Fram í kvöld. Lena Magrét Valdimarsdóttir missti af fjórða leiknum í röð. Hún handarbrotnaði í viðureign við Aftureldingu snemma í janúar og verður frá keppni áfram.
Svipaða sögu er að segja af Söru Dögg Hjaltadóttur leikmanni ÍR sem einnig fjarverandi vegna handarbrots. Sara Dögg handarbrotnaði í upphafi ársins.
Staðan og næstu leikir í Olísdeildunum.
Mörk Fram: Alfa Brá Hagalín 8, Kristrún Steinþórsdóttir 5, Elna Ólöf Guðjónsdóttir 4, Berglind Þorsteinsdóttir 2, Þórey Rósa Stefánsdóttir 2, Erna Guðlaug Gunnarsdóttir 2, Harpa María Friðgeirsdóttir 1.
Varin skot: Andrea Gunnlaugsdóttir 11, Ethel Gyða Bjarnasen 6.
Mörk ÍR: Karen Tinna Demian 7, Vaka Líf Kristinsdóttir 3, Sigrún Ása Ásgrímsdóttir 3, Ásthildur Bertha Bjarkadóttir 2, Sylvía Sigríður Jónsdóttir 2, Katrín Tinna Jensdóttir 2, Matthildur Lilja Jónsdóttir 2, Hanna Karen Ólafsdóttir 1, Guðrún Maryam Rayadh 1.
Varin skot: Hildur Öder Einarsdóttir 16.
Tölfræði leiksins hjá HBStatz.
