„Markmiðið er alltaf að vinna alla leiki og ég er ánægður með hvaða hugarfari menn mættu í leikinn,“ sagði Aron Kristjánsson, þjálfari deildarmeistara Hauka í handknattleik karla, í samtali við handbolta.is í gærkvöld eftir að lið hans innsiglaði sæti sitt í undanúrslitum Olísdeildar með öðrum öruggum sigri á Aftureldingu, 36:22, í átta liða úrslitum og samtals með 24 marka mun, 71:47.
„Fimm einn vörnin sem við lékum í upphafi gekk þokkalega og eins sex núll vörnin í síðari hálfleik. Margir leikmenn lögð sitt af mörkum. Það var gott að taka þennan leik sannfærandi á þennan hátt. Aftureldingarliðið er í vandræðum með meiðsli og hefur því ekki eins sterkt lið og oft áður.
Næstu skref hjá okkur er undirbúningur fyrir undanúrslitin þar sem við mætum annað hvort Selfossi eða Stjörnunni. Við höfum svo sem verið í hörkuleikjum upp á síðkastið, bæði í úrslitaleik við FH um deildarmeistaratitilinn og síðan í bikarleik við Selfoss nokkrum dögum síðar. Allt snýst um að leika hvern leik af krafti og fagmennsku. Við höfum ekkert verið í rólegheitum upp á síðkastið,“ sagði Aron Kristjánsson, þjálfari Hauka, við handbolta.is í gærkvöld.
