Andlát: Gunnar K. Gunnarsson

Gunn­ar K. Gunn­ars­son fyrrverandi stjórnarmaður og framkvæmdastjóri HSÍ lést 4. sept­em­ber síðastliðinn á Heil­brigðis­stofn­un Suður­lands í Vest­manna­eyj­um, 74 ára að aldri.

Gunn­ar var virk­ur í fé­lags­störf­um inn­an íþrótta­hreyf­ing­ar­inn­ar og sat í stjórn HSÍ 1980-1984 og 1987-1992 á miklum uppgangsárum handknattleiks hér á landi. Gegndi hann m.a. embætti gjaldkera. Einnig var Gunnar um skeið framkvæmdastjóri HSÍ á 10. áratugnum. Kom hann m.a. að skiplagningu, undirbúningi og vinnu við heimsmeistaramót karla í handknattleik sem haldið var hér á landi 1995. Gunnar var í stjórn handknattleiksdeildar Þróttar um árabil.

Auk setu í stjórn og starfa fyrir HSÍ var Gunnar handknattleiksdómari og síðar eftirlitsmaður á leikjum innanlands um áratugaskeið. Hann var jafn­framt eft­ir­lits­dóm­ari hjá Handknattleikssambandi Evrópu, EHF, frá 1993 til 2018. Gunnar var sæmdur gullmerki EHF þegar hann hætti sem eftirlitsmaður EHF fyrir sex árum. Einnig hlaut Gunnar gullmerki HSÍ og fleiri félaga og sérsambanda fyrir störf sín.

Gunnar bjó í Vest­manna­eyj­um frá 1995 til æviloka. Hann var fram­kvæmda­stjóri Heil­brigðis­stofn­un­ar­inn­ar í Vest­manna­eyj­um frá 1995 til 2014 þegar starfsævinni lauk.

Eft­ir­lif­andi eig­in­kona Gunn­ars er Sigrún Inga Sig­ur­geirs­dótt­ir. Börn þeirra eru María Krist­ín, Gunn­ar Geir og Inga Lilý. Barna­börn­in eru sjö.

Fram kemur á mbl.is í dag að útför Gunnars fari fram frá Landa­kirkju í Vest­manna­eyj­um 14. sept­em­ber kl. 13.