Andrea Jacobsen og félagar í EH Aalborg halda áfram að sitja í efsta sæti næst efstu deildar danska handknattleiksins eftir níunda sigurinn í 10 leikjum í dag. EH vann Hadsten Håndbold, 25:19, í dag eftir að hafa verið sex mörkum yfir í hálfleik, 14:8.
Andrea skoraði fjögur mörk í leiknum, þar af þrjú í fyrri hálfleik.
Berta Rut Harðardóttir tók talsvert þátt í leik Holstebro sem vann Ringsted örugglega á heimavelli í hádegisleik deildarinnar, 32:24. Berta Rut skorað fjögur mörk í leiknum en lið hennar var með átta marka forskot í hálfleik, 19:11, og hélt í horfinu í þeim síðari.
Holstebro sem féll úr úrvalsdeildinni í vor er í öðru sæti næst efstu deildar með 16 stig eftir níu leiki. Á leik til góða á Álaborgarliðið. Margt bendir til þess að Holstebro etji kappi við EH Aalborg um efsta sætið og keppnisrétt í úrvalsdeild á næstu leiktíð.
