- Auglýsing -

Andri Már er gjaldgengur með Haukum í kvöld

Andri Már Rúnarsson er orðinn liðsmaður Hauka. Mynd/Haukar

Félagaskipti Andra Más Rúnarssonar frá þýska liðinu Stuttgart til Hauka hafa öðlast gildi eftir því sem fram kemur á heimasíðu HSÍ í dag. Andri Már er þar með gjaldgengur með Haukum og getur tekið þátt í viðureign Hauka og KA í 1. umferð Olísdeildar í kvöld. Leikurinn hefst klukkan 19.30 á Ásvöllum.


Opinberað var á þriðjudaginn að Andri Már gengi til liðs við Hauka eftir árs dvöl hjá Stuttgart. Nauðsynleg pappírsvinna og frágangur á milli félaga og sérsambanda yfir höf og lönd vill taka sinn tíma. Auk þess þurftu Haukar í þessu tilfelli að greiða talsverða upphæð í félagaskiptagjald milli landa. Getur gjaldið hlaupið á nokkrum hundruðum þúsunda sem rennur að mestu leyti til alþjóðlegra sérsambanda.


Alexandra Líf til Fredrikstad

Til viðbótar gengu í gegn í morgun félagaskipti Alexöndru Lífar Arrnarsdóttur frá Haukum til norska úrvalsdeildarliðsins Fredrikstad Bkl. Tilkynnt var snemmsumars að hún hafi skrifað undir samkomulag við norska félagið sem hefur íslenska þjálfarann Elías Má Halldórsson við stjórnvölin. Frágangur virðist hafa dregist og ekki er langt síðan að fært var til bókar á félagaskiptasíðu HSÍ flutningur Alexöndru Lífar úr HK til Hauka en hún var í láni hjá Kópavogsliðinu á síðasta keppnistímabili.

Lánasamningur Hauka og Fredrikstadt Bkl vegna Alexöndru Lífar er til loka júní 2024.

- Auglýsing -
- Auglýsing -

Nýjustu fréttir

- Auglýsing -