Andri Snær Stefánsson hefur ákveðið að hætta þjálfun kvennaliðs KA/Þór í handknattleik eftir þrjú ár í brúnni. Frá þessu er sagt á Akureyri.net, fréttmiðlinum öfluga á Akureyri. Þar kemur fram að Andri Snær hafi tilkynnt stjórn KA/Þórs ákvörðun sína.
Ekki virðist liggja fyrir hver tekur við af Andra Snæ.
Undir stjórn Andra Snæs hefur KA/Þór orðið að einu allra öflugasta kvennaliði landsins. Eftirminnilegt er keppnistímabilið 2020/2021 þegar liðið vann Íslandsmeistaratitilinn, bikarmeistaratitilinn, deildarbikarinn og meistarakeppni HSÍ. Leiktímabilið 2021/2022 tók KA/Þór þátt í Evrópukeppni í fyrsta sinn og vann báða leiki sína í fyrstu umferð og féll naumlega úr leik fyrir spænsku félagsliði í annarri umferð í tveimur leikjum ytra.
Fyrir nýliðna leiktíð í Olísdeild kvenna voru miklar breytingar á leikmannahópi KA/Þórs frá síðustu árum. Liðið hafnaði í sjötta sæti í deild og tapaði í oddaleik í 1. umferð úrslitakeppni Olísdeildar fyrir Stjörunni. Einnig tók KA/Þór þátt í Evrópukeppni í byrjun vetrar undir stjórn Andra Snæs.
