Ribe-Esbjerg tapaði öðrum leik sínum í vikunni í dönsku úrvalsdeildinni í handknattleik í kvöld þegar Skanderborg Aarhus, SAH, fór með bæði stigin heim úr heimsókn sinni til Esbjerg, 27:23. Á sunnudaginn mátti Ribe-Esbjerg þola tap í heimsókn til Álaborgar.
Ribe-Esbjerg var tveimur mörkum yfir eftir fyrri hálfleik, 12:10. Leikmenn Skanderborg Aarhus léku frábæra vörn í síðari hálfleik og sneru leiknum sér í hag.
Ágúst Elí Björgvinsson stóð hluta leiksins í marki Ribe-Esbjerg og varði sex skot, 35%. Elvar Ásgeirsson, sem skrifaði undir lengri samning á dögunum, skoraði eitt mark og átti þrjár stoðsendingar.
Eftir sigur í tveimur fyrstu leikjunum í deildinni, m.a. á GOG, hefur Ribe-Esbjerg-liðinu fatast flugið í síðustu tveimur viðureignum.