Annan leikinn í röð geigaði ekki skot hjá Hafnfirðingnum Orra Frey Þorkelssyni í leik með Sporting Lissabon í portúgölsku 1.deildinni í handknattleik. Hann var með fullkomna nýtingu annan leikinn í röð þegar Sporting vann Póvora AC, 35:23, á útivelli í sjöundu umferð deildarinnar.
Orri Freyr skoraði fjögur mörk úr fjórum skotum og hefur þar með átt 14 markskot í röð í tveimur leikjum án þess að bregðast bogalistin. Fyrir leikinn í gær var Orri Freyr með 88% skotnýtingu í sex fyrstu leikjum Sporting í portúgölsku 1. deildinni. Víst er að ekki versnaði hlutfallið í gær.
Ekki aðeins leikur allt í lyndi hjá Orra Frey innan vallar. Liði hans, Sporting, gengur allt í haginn. Sporting er efst og taplaust með 21 stig eftir sjö umferðir, stigi á undan meisturum Porto.
Benfica, sem Stiven Tobar Valencia leikur með, er í fjórða sæti með 16 stig eftir tap fyrir Porto í gær, 37:33. Stiven Tobar skoraði ekki mark í leiknum.
Þrjú stig fást fyrir sigur í portúgölsku 1. deildinni, tvö fyrir jafntefli og eitt fyrir tap. Þar af leiðandi geta lið sópað til sín stigum þótt hvorki gangi né reki innanvallar.
Stöðuna í portúgölsku 1. deildinni í karlaflokki og í fleiri deildum handknattleiks í Evrópu er hægt að skoða hér.
