Neistin, sem Arnar Gunnarsson þjálfar og Finnur Hansson leikur með, tapaði öðrum leiknum í röð í færeysku úrvalsdeildinni í handknattleik í kvöld þegar liðið sótti Team Klaksvik heim í Klaksvikar badmintonhöll, 33:32.
Neistin var með tveggja marka forskot að loknum fyrri hálfleik, 16:14, og var fjórum mörkum yfir um miðjan síðari hálfleik, 26:22. Eftir það virtist allt fara í skrúfuna hjá leikmönnum Neistans og heimamenn gengu á lagið.
Finnur skoraði ekki mark í leiknum.
Neistin er enn í öðru sæti með 10 stig eftir átta leiki. VÍF frá Vestmanna er efstu með 11 stig að loknum sjö leikjum. H71 er með 9 stig í þriðja sæti eftir sex leiki. Hörður Fannar Sigþórsson og samherjar í KÍF frá Kollafirði er í fjórða sæti, hafa átta stig eftir jafnmarga leiki.
