Kvennalið Aftureldingar fetaði í fótspor karlaliðsins og stóð uppi sem sigurvegari á UMSK-mótinu í kvöld með öruggum sigri á HK, 25:22, í þriðja og síðasta leik sínum í mótinu. Afturelding vann allar þrjár viðureignir sínar í mótinu, gegn Stjörnunni og Gróttu auk HK í dag. Karlalið Aftureldingar vann UMSK-mótið á laugardaginn.
Afturelding var með yfirhöndina frá upphafi til enda í Kórnum í Kópavogi í kvöld. Staðan þegar fyrri hálfleikur var að baki var, 12:9, Aftureldingu í vil. Í síðari hálfleik var munurinn tvö til fimm mörk.
Saga Sif Gísladóttir markvörður Aftureldingar átti stórleik. Hún varði 16 skot. Saga Sif gekk til liðs við Aftureldingu í sumar. Sylvía Björt Blöndal, markadrottning Grill 66-deildar á síðustu leiktíð, var ekki í leikmannahópi Aftureldingar að þessu sinni.
Afturelding verður nýliði í Olísdeildinni þegar flautað verður til leiks 10. september. HK féll úr Olísdeildinni í vor og tekur þar með sæti í Grill 66-deildinni sem hefst undir lok september.
Mörk Aftureldingar: Susan Ines Gamboa 6, Katrín Helga Davíðsdóttir 5, Ragnhildur Hjartardóttir 4, Stefanía Ósk Engilbertsdóttir 4, Hildur Lilja Jónsdóttir 2, Katrín Erla Kjartansdóttir 2, Brynja Rögn Fossberg Ragnarsdóttir 1, Drífa Garðarsdóttir 1.
Varin skot: Saga Sif Gísladóttir 16.
Mörk HK: Inga Fanney Hauksdóttir 8, Aníta Eik Jónsdóttir 3, Sóley Ívarsdóttir 3, Katrín Hekla Magnúsdóttir 2, Leandra Náttsól Salvamoser 2, Aníta Björk Bárðardóttir 1, Amelía Laufey M. Gunnarsdóttir 1, Margrét Guðmundsdóttir 1, Þórhildur Braga Þórðardóttir 1.
Varin skot: Þórfríður Ina Arinbjarnardóttir 8, Tanja Glóey Þrastardóttir 2.
Leikjadagskrá Olísdeildanna.
Leikjadagskrá Grill 66-deildanna.
UMSK-mót kvenna.
