Arnar Birkir Hálfdánsson leikur ekki áfram á næstu leiktíð með þýska handknattleiksliðinu EHV Aue eftir því sem greint er frá á Facebooksíðu félagsins í kvöld. Þar kemur fram að Arnar Birkir sé einn átta leikmanna sem eru að kveðja félagð. EHV Aue var að leika sinn síðasta heimaleik á keppnistímabilinu í kvöld. Aue-menn notuðu tækifærið og glöddu stuðningsmenn sína með því að vinna Emsdetten með sjö marka mun, 38:31.
Ekki kemur fram í tilkynningunni með hvaða liði Arnar Birkir hyggst leika á næsta keppnistímabili. Hann kom til Aue sumarið 2020 frá danska úrvalsdeildarliðinu SönderjyskE.
Bæði EHV Aue og Emsdetten eru fallin úr 2. deild. Síðarnefnda liðið rekur lestina fyrir lokaumferðina. Ekki liggur fyrir hvert verður þriðja liðið sem fylgir Emsdetten og Aue niður í 3. deild en þrjú lið róa lífróður fyrir áframhaldandi veru í deildinni, Grosswallstadt, Ferndorf og Dormagen.
Arnar Birkir skoraði þrjú mörk fyrir Aue í kveðjuleiknum á heimavelli og átti níu stoðsendingar. Eftir því sem næst verður komist verður Sveinbjörn Pétursson áfram í herbúðum Aue-liðsins á næstu leiktíð. Hann stóð stærstan hluta leiksins í kvöld í marki liðsins og varði vel, 14 skot, 37% hlutfallsmarkvarsla.
Anton Rúnarsson skoraði sex mörk fyrir Emsdetten og átti þrjár stoðsendingar. Örn Vésteinsson Östenberg átti eina stoðsendingu en lánaðist ekki að skora.
