Handknattleiksdeild ÍBV hefur samið við Arnór Viðarsson um framlengingu á samningi hans við félagið.
Arnór er kraftmikil skytta sem hefur vaxið gífurlega í sínum leik undanfarin ár. Hann er tvítugur en hefur mikla reynslu í Olís deildinni miðað við aldur. Arnór hefur skoraði 40 mörk í 13 leikjum í Olísdeildinni í vetur. Þess utan var Arnór afar traustur varnarmaður og rammur að afli.
Arnór hefur leikið með yngri landsliðum Íslands og leikur nú með U-21 árs landsliðinu sem leikur tvo vináttuleiki við Frakka ytra 10. og 11. mars.
„Við erum afar ánægð með að Arnór muni áfram leika með ÍBV og hlökkum til áframhaldandi samstarfs,“ segir í tilkynningu frá handknattleiksdeild ÍBV í kvöld.
ÍBV hefur endurnýjað samninga við nokkra leikmenn á undanförnum vikum auk þess að ráða Magnús Stefánsson sem þjálfara karlaliðs félagsins frá og með næstu leiktíð í stað Erlings Birgis Richardssonar.
