Arnór Atlason og lærisveinar hans í TTH Holstebro fögnuðu í kvöld sigri í fyrri viðureigninni við Skive um sæti í dönsku úrvalsdeildinni í handknattleik á næstu leiktíð, 29:24. Leikurinn fór fram í Holstebro. Liðin mætast öðru sinni í Skive á föstudaginn. Samanlögð úrslit leikjanna tveggja ræður því hvort liðið leikur í úrvalsdeildinni.
Holstebro var marki yfir í hálfleik, 13:12, og tókst ekki að hrista leikmenn Skive af sér fyrr en á síðasta stundarfjórðungnum. Reikna má með að Skive-ingar hafi ekki sagt sitt síðasta í þessari rimmu og muni veita harða mótspyrnu á heimavelli á föstudaginn.
Annað árið í röð
Þetta er annað árið í röð sem TTH Holstebro tekur þátt í umspilinu. Liðið rak lestina í keppni fimm neðstu liðanna sem lauk á dögunum um að forðast umspilsleikina. Skive vann á hinnbóginn Midtjylland í umspili 1. deild og öðlaðist þannig réttinn að skora lið Holstebro á hólm.
Grindsted GIF Håndbold vann 1. deildina og hafði sætaskipti við Lemvig sem féll úr úrvalsdeildinni.
