Arnór Snær Óskarsson leikmaður Vals leikur að öllum líkindum í Þýskalandi á næsta keppnistímabili. Samkvæmt heimildum handbolta.is er Arnór Snær undir smásjá Rhein-Neckar Löwen og hafa viðræður átt sér stað á milli hans og félagsins upp á síðkastið.
Samkvæmt heimildum er ekki loku fyrir það skotið að Arnór Snær heimsæki Rhein-Neckar Löwen í næstu viku í framhaldi af síðari leik Vals og Göppingen í 16-liða úrslitum Evrópudeildarinnar.
Arnór Snær, sem er á 23. aldursári, hefur farið á kostum með Valsliðinu á keppnistímabilinu og vakið verðskuldaða athygli í leikjum liðsins í Evrópudeildinni. Fyrir vikið hafa nokkur félög horft hýru auga til Arnórs Snæs en ríkastur áhugi hefur verið af hálfu Rhein-Neckar Löwen þar sem fyrir er Valsarinn og landsliðsmaðurinn Ýmir Örn Gíslason.
Arnór Snær er í hópi markahæstu manna keppninnar með 61 mark og 65% skotnýtingu. Einnig var Arnór Snær kallaður inn í landsliðshópinn fyrir leikina við Tékka í upphafi þessa mánaðar.
Stiven til Benfica?
Fleiri leikmenn Vals virðast ætla að róa á önnur mið eftir keppnistímabilið. Talsvert hefur verið rætt um hugsanleg vistaskipti Stiven Tobar Valencia. Fyrir nokkru var Stiven orðaður við ungverska liðið Veszprém. Nú virðist hann stefna í aðra átt. Í gærkvöldi sagði Arnar Daði Arnarsson fjölmiðamaður, handboltasérfræðingur og þjálfari hjá Val frá því á Twitter að Stiven fari til portúgalska liðsins Benfica í sumar.
Samkvæmt áreiðanlegum heimildum Sérfræðingsins er Stiven Tobar Valencia á leið til Benfica í Portúgal. Áhugavert skref. Ég man ekki eftir íslenskum leikmanni í Portúgal en deildin hefur tekið stakkaskiptum síðustu ár. La Valsia akademían að skila N1 atvinnumanninum. Einar. pic.twitter.com/N6TM2qoyQ8
— Arnar Daði (@arnardadi) March 21, 2023
Benfica er með bækistöðvar í Lissabon og hefur verið í mikilli sókn síðustu árin þótt það hafi lengst af verið þekkt sem knattspyrnulið.
Benfica vann m.a. Evrópudeildina á síðasta tímabili. Möguleikar þess í titilvörninni eru hinsvegar nánast úr sögunni eftir 13 marka tap fyrir Flensburg í fyrri viðureign liðanna í gærkvöld.
Evrópudeildin: 16-liða úrslit, fyrri leikir, úrslit
