Aron Pálmarsson fór meiddur af leikvelli þegar um 20 mínútur voru liðnar af viðureign Aalborg Håndbold og Ringsted í dönsku úrvalsdeildinni í handknattleik í gærkvöld. Kom hann ekkert meira við sögu. Fram kemur á nordjyske.dk í morgun að Aron hafi fundið til særinda í mjöðm og ekki treyst sér til þess að halda áfram leik.
Aron fer í skoðun hjá lækni í dag þar sem ástandið verður metið.
Hann hafði skorað þrjú mörk og átt þrjár stoðsendingar á fyrstu 20 mínútunum. Aalborg vann leikinn örugglega, 38:30, og fékk þar með sín fyrstu stig í úrvalsdeildinni á keppnistímabilinu.
Næsti leikur dönsku meistaranna verður á móti Nordsjælland á laugardaginn og síðan hefst keppni í Meistaradeild Evrópu á miðvikudaginn. Aalborg mætir HC PPD Zagreb á útivelli í fyrstu umferð riðlakeppni Meistaradeildar.