Sunnudaginn 30. apríl fer fram 66. ársþing Handknattleikssambands Íslands í Laugardalshöll. Stefnt er á að þingið hefjist klukkan 9 árdegis. Síðar sama dag leikur íslenska karlalandsliðið sinn síðasta leik í undankeppni EM2023 gegn Eistlandi. Leikurinn verður einnig í Laugardalshöll.
Í tilkynningu frá skrifstofu HSÍ segir m.a.: „Tilkynning um framboð til embættis formanns og stjórnar HSÍ skal berast skrifstofu HSÍ minnst 21 degi fyrir þing. Uppstillingarnefnd er þó heimilt að samþykkja framboð sem fram kemur síðar.
Málefni sem aðildarfélög eða sambandsaðilar óska eftir að tekin verði fyrir á þinginu skulu tilkynnt stjórn HSÍ minnst 21 degi fyrir þingið og skal stjórnin senda öllum aðildarfélögum og sambandsaðilum þau málefni eigi síðar en 7 dögum fyrir þingsetningu ásamt dagskrá þingsins.“
Eftir því sem handbolti.is kemst næst hyggst sitjandi formaður HSÍ, Guðmundur B. Ólafsson, gefa kost á sér til endurkjörs. Formaður er kjörinn til tveggja ára eins og aðrir stjórnarmenn.
Inga Lilja Lárusdóttir, Jón Viðar Stefánsson, Páll Þórólfsson og Reynir Stefánsson voru kjörin í stjórn fyrir tveimur árum og rennur umboð þeirra út á þinginu.
Aðrir stjórnarmenn voru kjörnir fyrir ári og eiga þar með eitt starfsár eftir.
