Handknattleikskonan Ásdís Guðmundsdóttir er hætt að leika með sænska úrvalsdeildarliðinu Skara HF og er flutt heim til Akureyrar. Frá þessu greinir Akureyri.net í dag. Þar segir ennfremur að Ásdís hafi fengið samningi sínum við sænska félagið rift af persónulegum ástæðum.
Ásdís gekk til liðs við Skara HF á síðasta sumri frá KA/Þór en hún var í stóru hlutverki í Íslands- og bikarmeistaraliði félagsins árið 2021. Ásdís hefur einnig leikið nokkra A-landsleiki.
Skara HF er um miðja sænsku úrvalsdeildina og hefur átt góðu gengi að fagna í undanförnum leikjum.
Óvíst hvað tekur við
Óljóst er hvað tekur við hjá Ásdísi. Hún hefur ekki rætt við forráðamenn KA/Þórs samkvæmt heimildum Akureyri.net. Frestur til félagaskipta rennur út um mánaðamótin.
Aldís Ásta Heimisdóttir og Jóhanna Margrét Sigurðardóttir leika áfram með Skara HF.
