- Auglýsing -
Ásthildur Bertha Bjarkadóttir hefur ákveðið að breyta til og ganga til liðs við lið ÍR sem leikur í Grill66-deildinni á næsta keppnistímabili undir stjórn Sólveigar Láru Kjærnested.
Handknattleiksdeild ÍR sagði frá komu Ásthildar Berthu í morgun.
Ásthildur Bertha er örvhent og leikur í hægra horni. Hún hefur undanfarin ár verið í herbúðum Stjörnunnar og lék m.a. 18 leiki í Olísdeildinni á síðasta keppnistímabili og skoraði 19 mörk. Einnig skoraði Ásthildur Bertha 35 mörk í 15 leikjum með ungmennaliði Stjörnunnar í Grill66-deildinni. Áður en hún gekk til liðs við Stjörnuna lék hún og æfði með Fylki í Árbæ.
„Ásthildur er afar spennandi örvhentur hornamaður sem býr yfir miklum hraða og er frábær í hóp. Hún á að baki fjölda landsleikja fyrir yngri landslið Íslands. Við erum mjög ánægð með að hafa tryggt okkur krafta Ásthildar og hlökkum til að fylgjast með henni í ÍR treyjunni,“ segir í tilkynningu frá handknattleiksdeild ÍR.
- Auglýsing -
