Axel Stefánsson og liðskonur hans í norska úrvalsdeildarliðinu Storhamar leika til úrslita um norska bikarinn í handknattleik á morgun gegn bikarmeisturum síðustu ára, Vipers Kristiansand. Storhamar vann Sola örugglega í undanúrslitum í dag, 33:23, í leik sem vonir stóðu til að gæti orðið spennandi. Sú varð ekki raunin. Staðan var 16:7 að loknum fyrri hálfleik, Storhamar í vil.
Vipers fór illa með Larvik, 40:24, í hinni viðureign undanúrslitanna en leikið er í Sør Amfi í Arendal. Einnig er þar leikið til undanúrslita í karlaflokki í dag og til úrslita á morgun.
Vipers og Storhamar eru í tveimur efstu sætum norsku úrvalsdeildarinnar í kvennnaflokki.
Norðmenn hafa haft þann hátt á undanfarin ár að leika svokallaða final8-helgi með undanúrslitum og úrslitum á einum stað á tveimur dögum. Sør Amfi í Arendal þykir kjörinn vettvangur til þess enda á allan hátt gott keppnishús á snotrum stað í suðurhluta Noregs.
Haslum og Kolstad mætast í undanúrslitum í karlaflokki og Elverum og Kristiansand í hinum leiknum. Fyrri undanúrslitaleikur karla er nýlega hafinn þegar þetta er ritað.
