Norska úrvalsdeildarliðið Storhamar, sem Axel Stefánsson þjálfar við annan mann, er í góðri stöðu eftir sigur á þýska liðinu Thüringen, 39:35, í fyrri viðureigna liðanna í átta liða úrslitum Evrópudeildar kvenna í handknattleik í dag. Viðureignin fór fram í Þýskalandi. Liðin mætast öðru sinni í Hamar í Noregi á laugardaginn.
Rúmenska liðið Dunarea Braila, sem vann Íslandsmeistara Vals, í fyrstu umferð forkeppni Evrópudeildarinnar í haust, er í góðum málum eftir að hafa lagt króatísku meistarana Podravka, 32:26, í Króatíu í gær en liðin eru einnig í átta liða úrslitum Evrópudeildarinnar. Rúmenska liðið er þar með komið nærri undanúrslitum.
Annað rúmenskt lið, CS Gloria 2018 BN, lagði Motherson Mosonmagyarovari KC frá Ungverjalandi, 32:30, í Ungverjalandi.
Í fjórðu viðureign átta liða úrslita hafði franska liðið Netptunes Nantes betur á heimavelli gegn Camillu Herrem og samherjum í norska liðinu Sola HK frá Stafangri, 31:27.
Átta liða úrslitum Evrópudeildar lýkur um næstu helgi.
