Báðir leikirnir í Kósovó

Nær fullvíst er að báðar viðureignir Íslandsmeistara KA/Þórs við KHF Istogu frá Kósovó í 1. umferð Evrópubikarkeppninnar fari fram ytra. Akureyri.net hefur í dag eftir Erlingi Kristjánssyni, formanni kvennaráðs KA/Þórs, að það komi betur úr fjárhagslega að leika báða leikina ytra. Einnig hafi sóttvarnareglur sitt að segja.

Til greina kom að liðin mættust í tvígang á Akureyri en frá því hefur verið horfið eða alltént eru afar litlar líkur til þess eftir því sem greint er frá á Akureyri.net.

Evrópuleikirnir verða þeir fyrstu í sögu KA/Þórs. Til stóð að liðið tæki þátt í Evrópubikarkeppninni á síðasta ári og hafði Akureyrarliðið dregist gegn liði frá Ítalíu. Fallið var frá leikjunum vegna faraldurs kórónuveiru.