„Portúgalar eru minni og kvikari en aðrir þeir sem við höfum fengist við á mótinu til þessa,“ sagði Einar Bragi Aðalsteinsson einn leikmanna U21 árs landsliðs karla í handknattleik þegar handbolti.is hitti hann að máli eftir æfingu íslenska landsliðsins í handknattleik í Berlín í dag, daginn fyrir leikinn mikilvæga í átta liða úrslitum heimsmeistaramótsins við Portúgal klukkan 13.45 á morgun, föstudag.
„Það er mikil tilhlökkun í hópnum að takast á við þetta verkefni. Við höfum verið góðir til þessa að fást við hvert verkefni fyrir sig. Eitthvað sem við höfum ef til vill lært af reynslunni frá mótunum á síðustu árum. Hvað gerist eftir leikinn á morgun, hugsum við um seinna og tökumst á við,“ sagði Einar Bragi en sigurliðið í viðureign Íslands og Portúgals á morgun öðlast sæti í keppni í undanúrslitum og mætir annað hvort Dönum eða Þjóðverjum.
Viðureign Íslands og Portúgals í átta liða úrslitum á heimsmeistaramóti karla hefst klukkan 13.45. Handbolti.is mun fylgjast grannt með leiknum á morgun.
HMU21: Dagskrá og úrslit síðustu leikja mótsins
