Daníel Freyr Andrésson og samherjar hans í Guif frá Eskilstuna unnu í kvöld sannkallaðan baráttusigur í heimsókn sinni til Helsingborg hvar þeir léku við samnefnt lið. Lokatölur, 29:27, eftir æsispennandi lokamínútur leiksins þar sem litlu mátti muna hvorum meginn sigurinn hafnaði.
Daníel Freyr var í marki Guif frá upphafi til enda leiksins. Hann varði 12 skot, þar af eitt vítakast sem lagði sig á 32,5% hlutfallsmarkvörslu.
Leikmenn Helsingborg voru marki yfir í hálfleiks, 15:14. Guif sneri leiknum sér í hag fljótlega í síðari hálfleik og náði mest þriggja marka forskoti um skeið. Heimamenn saumuðu að gestum sínum undir lokin en allt kom fyrir ekki.
Guif hefur þar með fjögur stig eftir þrjá leiki. Skövde er efst í deildinni með sex stig en IFK Kristianstad, sem Ólafur Andrés Guðmundsson og Teitur Örn Einarsson leika með er næst á eftir með fjögur stig að loknum tveimur leikjum.
