Benedikt Gunnar Óskarsson leikmaður U19 ára landsliðs karla í handknattleik er svo sannarlega ekki á heimleið frá Króatíu að loknu Evrópumeistaramótinu eins og aðrir í íslenska hópnum nú þegar mótið er á enda. Benedikt Gunnar verður eftir í Króatíu og verður í viku til viðbótar í landinu. Ekki vegna þess að hann hafi tekið sérstöku ástfóstri við Króatíu heldur á hann fleiri leiki fyrir höndum í landinu á næstu dögum.
Benedikt Gunnar er leikmaður Vals en Valur leikur á næsta föstudag og laugardag við RK Porec í 1. umferð Evrópudeildarinnar í handknattleik. Í stað þess að koma heim með íslenska hópnum á morgun færir Benedikt Gunnar sig um set í Króatíu og fer á morgun til Porec frá Varazdin þar sem Benedikt og félagar í U19 ára landsliðinu hafa dvalið í tvær vikur. Hann kveður landsliðshópinn á miðri leið er hann fer áfram til Zagreb áleiðis heim til Íslands.
Milli Porec og Varazdin eru nærri 350 km. Porec er strandbær á vesturströnd Króatíu en Varazdin er í norðurhluta landsins, nærri landamærum Slóveníu. Benedikt Gunnar kemur sér fyrir á hóteli í Porec og bíður eftir félögum sínum í Val í þessum sögufræga strandbæ sem á sér sögu a.m.k. aftur til ársins 800 f.kr.
Samherjar Benedikts Gunnars í Valsliðinu halda til Króatíu á miðvikudag og munu vera væntanlegir til Porec á fimmtudaginn, eftir því sem næst verður komist. Þá verða væntanlega fagnaðarfundir því Óskar Bjarni Óskarsson, faðir Benedikts Gunnars, verður í föruneyti Valsliðsins.
