Landsliðskonan Berglind Þorsteinsdóttir var ekki með Fram í tveimur fyrstu leikjum Olísdeildarinnar. Hún verður áfram utan vallar næstu vikur. Ástæðan er sú að Berglind gekkst undir aðgerð í sumar vegna þrálátra meiðsla í vinstra hné sem gert höfðu henni gramt í geði um nokkurt skeið.
Rakel Dögg Bragadóttir þjálfari Fram sagði handbolta.is að enn eru nokkrar vikur í að Berglind mæti til leiks á ný með Fram-liðinu.
Vegna þessa var nafn Berglindar ekki að finna í landsliðshópnum sem tilkynntur var í gær til þátttöku á alþjóðlegu móti í Cheb í Tékklandi undir lok þessa mánaðar. Berglind hefur nánast átt fast sæti í landsliðinu undanfarin þrjú ár og leikið alls 25 landsleiki. Hún var m.a. í landsliðinu sem tók þátt í heimsmeistaramótinu undir lok síðasta árs.
