Í nýrri frétt á heimasíðu pólska liðsins Vive Kielce segir að meiri bjartsýni ríki en áður um að meiðsli Hauks Þrastarsonar séu ekki eins alvarleg og í fyrstu var óttast. Við skoðun bendir margt til þess að fremra krossband sé að minnsta kosti ekki slitið.
Haukur fer í myndatöku og ítarlega skoðun hjá læknum félagsins á morgun. Þá fæst staðfest niðurstaða hvers eðlis meiðslin eru.
Haukur fór í morgun frá Elverum í Noregi heim til Póllands eftir að hafa tekið þátt í leik Kielce og Elverum í Meistaradeild Evrópu í gærkvöldi. Í leiknum fékk Haukur högg á vinstra hné eftir að hafa farið fram í hraðaupphlaup. Óttast var að krossband hafi látið undan en slitið krossband þýðir sjö til níu mánaða fjarveru frá keppni.
Ef greiningin í morgun reynist rétt þá er talið að Haukur verði frá keppni í hálfan annan mánuð.
