Stórleikur verður í 16-liða úrslitum bikarkeppni HSÍ í karlaflokki þegar ÍBV fær bikarmeistara Vals í heimsókn. Liðin mættust í úrslitum Íslandsmótsins í vor svo úr varð skemmtilegt einvígi. Að þessu sinni mætast liðin í Vestmannaeyjum annað hvort 15. eða 16. desember. Dregið var í 16-liða úrslit bikarkeppninnar í hádeginu.
Hið nýstofnaða lið Víðis í Garði, sem leikur í 2. deild fær heimaleik gegn KA í íþróttahúsinu í Garðinum. Grill 66-deildarlið Kórdrengja mætir Olísdeildarliði Harðar á Ásvöllum í Hafnarfirði þar sem Kórdrengir eru með bækistöðvar.
Næst efsta lið Olísdeildar karla, Fram, sækir hið þrautreynda lið ÍBV 2 heim til Eyja og ljóst að mikil bikarstemning verður í Vestmannaeyjum eftir miðjan desember.
Eftirtalin lið drógust saman í 16-liða úrslitum:
HK – Afturelding.
ÍR – Selfoss.
Víðir – KA.
FH – Stjarnan.
ÍBV – Valur.
Kórdrengir – Hörður.
Víkingur – Haukar.
ÍBV 2 – Fram.
Leikirnir eiga að fara fram 15. og 16. desember. Staðfest leikjadagskrá verður vafalaust gefin út á allra næstu dögum.
