Ekki tekst að ljúka 16-liða úrslitum bikarkeppni kvenna í handknattleik í kvöld eins og vonir voru aldar í brjósti um. Viðureign ÍBV og KA/Þórs var frestað í þriðja sinn í morgun. Til stóð að leikurinn færi fram í dag í Vestmannaeyjum. Vegna þess að ekki mögulegt að fljúga á milli Akureyrar og Vestmannaeyja hafa öll áform um að liðin reyni með sér í kvöld verið ýtt út af borðinu.
Samkvæmt tilkynningu frá mótanefnd verður fjórða atlagan gerð miðvikudaginn 14. desember í Vestmannaeyjum.
Upphaflega áttu liðin að mætast í Vestmannaeyjum á þriðjudaginn í síðustu viku. Veðrið setti þá strik í reikninginn í samgöngum eins og nú. Hvassviðri hamlar flugi. Sömu sögu er að segja af atlögu sem átti að gera í gær.
Nú er að bíða og vona að veðrið leiki við landsmenn 14. desember svo hægt verði að ljúka 16-liða úrslitum bikarkeppninnar í kvennaflokki áður en jólahátíðin gengur í garð.
