Blásið verður til leiks í fyrstu umferð Coca Cola-bikars karla í kvöld þegar Olísdeildarliðin Haukar og Selfoss mætast í Schenkerhöllinni á Ásvöllum. Ráðgert er að leikurinn hefjist klukkan 19.30. Því miður verður áhorfendum ekki heimill aðgangur að leiknum en hann verður sýndur í beinni útsendingu á RÚV2.
Uppfært kl. 13.20 – leiknum hefur verið slegið á frest um óákveðinn tíma.
Haukar sitja í fjórða sæti Olísdeildar með 6 stig eftir fjóra leiki. Selfoss er í næsta þrepi fyrir neðan með 5 stig, eftir tvo sigurleiki, eitt jafntefli og eitt tap fram til þessa. Haukar hafa unnið þrjár viðureignir og tapað einni, gegn Val á heimavelli á síðasta föstudag.
Ljóst er að tvö lið Olísdeildar karla komast ekki í 16-liða úrslit keppninnar. Annað kvöld mætast Akureyrarliðin Þór og KA í Íþróttahöllinni á Akureyri klukkan 19.30. Eftir því sem næst verður komist verður Akureyrarslagurinn einnig sýndur á RÚV2.
Einnig eigast við á morgun í 1. umferð keppninnar ÍBV2 og Vængir Júpíters sem er nýliði í Grill 66-deild karla.
Eftir leikina í kvöld og annað kvöld standa 16-lið eftir í keppninni.
Keppni í Coca Cola-bikar kvenna hefst í 16-liða úrslitum.
