Handknattleiksmaðurinn Birkir Benediktsson hefur skrifað undir tveggja ára samning við bikarmeistara Aftureldingar. Þetta kemur fram í tilkynningu sem handknattleiksdeildin sendi frá sér í kvöld.
Birkir er enn einn leikmaður Aftureldingar sem kýs að vera um kyrrt. Afturelding hefur á síðustu vikum endurnýjað samninga við hóp leikmanna liðsins. Má þar með m.a. nefna auk Birkis þá Árna Braga Eyjólfsson, Blæ Hinriksson, Brynjar Vigni Sigurjónsson, Ihor Kopyshynskyi og Þorstein Leó Gunnarsson.
Birkir hefur verið einn af máttarstólpum Aftureldingar undanfarin ár. Hann skoraði 78 mörk í 22 leikjum í Olísdeildinni í vetur og var auk þess í sigurliði Aftureldingar í Poweradebikarnum snemma í síðasta mánuði. Eflaust á Birkir eftir að láta hendur standa fram úr ermum í úrslitakeppninni sem framundan er en Afturelding mætir Fram í átta liða úrslitum. Fyrsti leikur liðanna verður á sunnudaginn.
„Birkir er uppalinn hjá Aftureldingu og hefur spilað allan sinn meistaraflokksferil í Mosfellsbænum. Birkir hefur verið leiðandi í uppbyggingastarfi Aftureldingar undanfarin ár við þjálfun yngri flokka Aftureldingar. Birkir er frábær fyrirmynd fyrir yngri iðkendur Aftureldingar og hefur staðið vaktina eins og klettur í leikjum Aftureldingar. Þá er Birkir að klára sitt tíunda tímabil í meistaraflokki og er því sennilega að verða einn leikjahæsti leikmaður meistaraflokks Aftureldingar í efstu deild í handbolta,“ segir m.a. í tilkynningu handknattleiksdeildar Aftureldingar.
