Bjarki Már Elísson skoraði fjögur mörk í kvöld fyrir Veszprém þegar liðið gerði jafntefli við Dinamo Búkarest, 31:31, í viðureign liðanna í 10. umferð A-riðils Meistaradeildar Evrópu í handknattleik í kvöld. Mamdouh Ashem Shebib jafnaði metin fyrir Dinamo þegar 35 sekúndur voru til leiksloka.
Jafntefli verður til þess að Veszprém stendur jafnfætis PSG í efsta sæti riðilsins þegar hlé verður gert á keppni í Meistaradeildinni fram í febrúar. Hvort lið hefur 16 stig. Magdeburg er í þriðja sæti með 13 stig og Dinamo situr í fjórða sæti með 11 stig.
Veszprém var með þriggja marka forskot að loknum fyrri hálfleik í Búkarest í kvöld, 16:13.
Andrii Akimenko var markahæstur hjá Dinamo með sjö mörk og Lazar Kukic var næstur með fimm mörk. Mikita Vailupau og Petar Nenadic skoruðu sjö mörk hvor fyrir Veszprém.
Fór í efsta sæti
Í B-riðli komst pólska meistaraliðið Łomża Industria Kielce að minnsta kosti tímabundið í efsta sætið með sigri á Celje Lasko frá Slóveníu, 36:28, í Hala Legionow í Kielce síðdegis.
Barcelona, sem var í efsta sæti B-riðils fyrir leiki kvöldsins mætir Nantes síðar í kvöld. Arkadiusz Moryto skoraði átta mörk fyrir Kielce og Nedim Remili, Artsem Karalek og Nicolas Tournat skoruðu fimm mörk hvor. Ante Ivankovic skoraði níu mörk fyrir Celje og Fal Marguc var næstur með sex mörk.
