Bjarki Már Elísson og samherjar i Veszprém stigu stórt skref í áttina að átta liða úrslitum Meistaradeildar Evrópu í handknattleik í kvöld með stórsigri á erkifjendunum í Ungverjalandi, Pick Szeged, í fyrri viðureign liðanna í 1. umferð útsláttarkeppninnar, 36:23. Leikurinn fór fram í Szeged og dæmdu Anton Gylfi Pálsson og Jónas Elíasson viðureignina.
Veszprém-menn hreinlega kjöldrógu leikmenn Pick Szeged. Veszprém var með 13 marka forskot eftir fyrri hálfleik, 20:7, eftir að hafa skorað 11 af fyrstu 13 mörkum leiksins. Þetta er stærsta tap Pick Szeged í Meistaradeild Evrópu.
Bjarki Már skoraði 3 mörk. Gasper Marguc skoraði 11 mörk og Rasmus Lauge og Nedim Remili fjögur mörk hvor. Bogdan Radivojevic var markahæstur hjá Pick Szeged með sex mörk mörk en ekki stóð steinn yfir steini hjá liðinu að þessu sinni.
Meiri spenna ríkir fyrir síðari viðureign pólska liðsins Wisla Plock og Nantes eftir jafntefli, 32:32, í Póllandi. Liðin mætast á ný í Nantes eftir viku. Viktor Gísli Hallgrímsson varði fjögur skot í marki Nantes, 27. Þar af varði hann eitt vítakast eins og sjá má á myndskeiðinu hér fyrir neðan.
Shooting undefended from six or seven metres should be easy, right? @HBCNantes goalkeeper Viktor Hallgrímsson has other ideas 🔥#ehfcl pic.twitter.com/8PuIzZ83M8
— EHF Champions League (@ehfcl) March 22, 2023
Valer Rivera skoraði 9 mörk fyrir Nantes og Tin Lucin skoraði sex mörk fyrir Plock.
Kiel er í svipuðum sporum og Veszprém eftir öruggan sigur á Dinamo Búkarest í Rúmeníu, 41:28. Stanislav Kasparek og Ante Kuduz skoruðu sex mörk hvor fyrir Dinamo. Miha Zarabec, Sander Sagosen og Eric Johansson skoruðu sex mörk hver fyrir Kiel.
