Handknattleiksmaðurinn Björgvin Þór Hólmgeirsson hefur verið ráðinn framkvæmdastjóri handknattleiksdeildar ÍR, en frá þessu er greint í tilkynningu deildarinnar í dag.
Björgvin Þór hefur víða komið við í handboltaheiminum, leikið erlendis og með landsliðinu. Hann var lengi leikmaður ÍR og varð m.a. bikarmeistari með liði félagsins 2005 og 2013. Hann lagði skóna á hilluna nú á vordögum en hann hafði þá leikið um nokkurt skeið með Stjörnunni. Einnig lék Björgvin Þór með Haukum fyrir nokkrum árum.
„Við ÍR-ingar erum himinlifandi að fá Bjögga inn í starfið og félagið að nýju og mun reynsla hans og þekking án efa hjálpa okkur til muna,“ segir í tilkynningu handknattleiksdeildar ÍR í dag.
„Ég er fyrst og fremst spenntur að komast aftur inn í hlutina hjá uppeldisfélaginu mínu. Það er spennandi uppbygging bæði karla og kvenna megin í félaginu og ég hlakka til að leggja mitt á vogarskálarnar. Heima er líka lang best!,“ er haft eftir Björgvin Þór í fyrrgreindri tilkynningu.
