- Auglýsing -
„Botninn datt úr þessu hjá okkur þegar kom fram í síðari hálfleik. Ég er óánægður með það,“ sagði Einar Jónsson þjálfari Fram í samtali við handbolta.is í kvöld eftir sjö marka tap liðsins fyrir Val, 34:27, viðureign í Origohöllinni.
„Okkar markmið var alltaf að vinna leikinn en því miður þá var frammistaðan alls ekki nógu góð til þess. Við sýndum ekki sama karakter í kvöld og í undanförnum leikjum. Við vorum seinir til baka og fórum að svekkja okkur því sem illa gekk. Ef menn gera sig seka um slíkt í leik við Val þá er voðinn vís. Valsmenn stinga af eins og þeir gerðu á kafla í síðari hálfleik,“ sagði Einar og bætti við.
„Við verðum að snúa við blaðinu og leika mikið betur í næsta leik sem verður á föstudaginn, burt séð frá þeirri staðreynd að við mætum Valsmönnum einnig þá. Við höfum helling að bæta, það er ljóst,“ sagði afar vonsvikinn þjálfari Fram, Einar Jónsson.
- Auglýsing -
