Bruno heldur áfram hjá KA

Markvörðurinn Bruno Bernat hefur skrifað undir nýjan tveggja ára samning við handknattleiksdeild KA og leikur því áfram með sínu uppeldisfélagi næstu árin. Bruno hefur verið einn af betri markvörðum Olísdeildarinnar á leiktíðinni með 33% hlutfallsvörslu samkvæmt samantekt HBStatz.

Bruni var fyrir nokkru valinn í fyrsta sinn í U21 árs landsliðið sem lék tvo vináttuleiki við Frakka ytra um síðustu helgi. U21 árs landsliðið tekur þátt í HM í sumar.

„Við erum afar spennt fyrir því að halda Bruno áfram innan okkar raða en auk þess að vera frábær í markinu er Bruno þekktur fyrir frábærar sendingar upp völlinn sem hafa gefið fjölmörg mikilvæg hraðaupphlaupsmörk undanfarin ár,“ segir m.a. í tilkynningu frá handknattleiksdeild KA.