Halldór Örn Tryggvason hefur á ný verið ráðinn þjálfari karlaliðs Þórs í handknattleik karla. Um leið snýr varnarjaxlinn Brynjar Hólm Grétarsson heim eftir veru fyrir sunnan og tekur að sér hlutverk aðstoðarþjálfara auk þess að leika með Þórsliðinu í Grill 66-deildinni á næstu leiktíð.
Frá þessu er getið á Akureyri.net í morgun og vitnað í heimasíðu Þórs.
Einnig skrifuðu handknattleiksmennirnir ungu, Viðar Ernir Reimarsson og Kristján Páll Steinsson, markvörður, undir nýja samninga við Þór.
Halldór Örn þjálfaði Þór síðast tímabilið 2020/2021 þegar lið félagsins átti sæti í Olísdeildinni. Samningur hans við Þór er til tveggja ára.
Brynjar Hólm hefur leikið með Stjörnunni síðustu þrjú ár en var þar á undan með Þór og enn fyrr Akureyri handboltafélagi.
Markvisst haldið áfram
„Við höldum áfram með uppbyggingarstarfið sem við höfum verið í að undanförnu og horfum þá bæði til þess að þróa áfram okkar ungu leikmenn, en líka að fá heim reynda Þórsara sem hafa verið að spila annars staðar,“ segir Árni Rúnar Jóhansson, formaður handknattleiksdeildar Þórs kampakátur í samtali við heimasíðu Þórs.
