Keppni í norsku C-deildinni, 2. deild, í handknattleik karla og kvenna hefst ekki fyrr en í fyrsta lagi í desember samkvæmt því sem norska handknattleikssambandið ákvað í gær. Síðsumars var tilkynnt að reynt yrði að hefja keppni í lok þessa mánaðar og þótti mörgum það vera í seinna lagi. Nú er ljóst að enn verður dráttur á að flautað verði til leiks og eru forsvarsmenn félaganna orðnir langeygir og jafnvel svartsýnir á að eitthvað verði úr keppnistímabilinu.
Keppni stendur yfir í úrvalsdeildum karla og kvenna í Noregi og eins í 1. deild eða B-deildum, hjá báðum kynjum og hefur gengið án mikilli vandræða þrátt fyrir að kórónuveirann hafi geysað í Noregi eins og annars staðar. Af þessum sökum þykir mörgum illskiljanlegt að ekki megi flauta til leiks í C-deildunum og mun vera kurr í forráðamönnum nokkurra félaga sem hafa lagt talsvert í sölurnar.
Íslendingar eiga að minnsta kosti einn fulltrúa í norsku C-deildinni, Einar Jónsson þjálfara sem tók við þjálfun karlaliðs Bergsöya í sumar. Hann og hans menn hafa lítið getað gert annað en stundað æfingar síðustu vikur og mánuði og er lítið annað en áframhaldandi æfingar næstu vikurnar.
