Leikmenn handknattleiksliðs Vals í karlaflokki losnuðu úr sóttkví á föstudaginn að þremenningunum sem smituðustu undanskildum. Fleiri smit komu ekki fram og voru allir þeir sem reyndust neikvæðir við skimun á mánudaginn í sömu stöðu á föstudaginn. Þess vegna var sóttkví aflétt af þeim.
Valsliðið kom saman til æfingar í gær, þeirrar fyrstu í rúma viku og stefnt er að annarri æfingu í dag.
Framundan er annasöm vika hjá þeim leikmönnum Vals sem losnuðu úr sóttkví á föstudaginn. Þeir mæta Haukum í Meistarakeppni HSÍ í Origohöllinni á þriðjudagskvöld. Morguninn eftir halda Valsmenn til Króatíu þar sem þeir eiga fyrir höndum tvo leiki við RK Porec í 1. umferð Evrópudeildarinnar í handknattleik á föstudag og laugardag.
Ljóst er að Valsliðið verður án þremenninganna sem smituðust í Evrópuleikjunum tveimur.
