Britney Cots, leikmaður Stjörnunnar, er í leikmannahópi Senegal sem tekur nú þátt í Afríkumeistaramótinu í handknattleik kvenna í Dakar í Senegal. Cots og samherjar hafa þegar tryggt sér farseðilinn á HM í desember á næsta ári en Senegal leikur við Kongó um þriðja sæti mótsins á laugardaginn. Fjögur efstu lið mótsins öðlast þátttökurétt á HM fyrir hönd Afríku.
Senegal tapaði í kvöld fyrir Angóla í framlengdum undanúrslitaleik, 24:21, eftir að jafnt var, 20:20, að loknum 60 mínútum.
Angóla, sem orðið hefur Afríkumeistari í handknattleik kvenna þrisvar í röð, leikur við Kamerún í úrslitaleik mótsins á laugardaginn. Lið sömu þjóða mættust í úrslitaleik Afríkumótsins þegar það var síðasta haldið í Kamerún vorið 2021.
Afríkumeistaramótið fer að þessu sinni fram í Dakar í Senegal og hófst 9. nóvember með þátttöku landsliða 16 ríkja en gróska hefur verið í handknattleik kvenna víða í Afríku á síðustu árum.
