Víkingur getur í dag tryggt sér sæti í Olísdeild karla í handknattleik á nýjan leik. Víkingar mæta Fjölni í þriðja sinn í dag í Safamýri í úrslitum umspils Olísdeildar karla. Eftir að hafa unnið tvisvar sinnum vantar Víkingi aðeins einn vinning í viðbót í rimmunni. Flautað verður til leiks klukkan 14.
Víkingur vann öruggan sigur í fyrstu viðureigninni á þriðjudaginn í Safamýri, 32:25. Viðureign liðanna í Dalhúsum á föstudaginn var jafnari, eða a.m.k. sveiflukenndar. Bæði lið áttu sína góðu og slæmu kafla. Að lokum áttu leikmenn Víkings endasprettinn og unnu, 29:25.
Áfram verður leikið í undanúrslitum Olísdeildar kvenna. Haukar freista þess að jafna metin í rimmunni við deildarmeistara ÍBV á Ásvöllum í dag eftir sjö marka tap í Vestmannaeyjum á laugardaginn, 29:22.
Valur fer með tap á bakinu í heimsókn í TM-höll Stjörnunnar. Fyrsti leikur liðanna var æsispennandi og varð að grípa til framlengingar í Origohöllinni á laugardaginn til þess að knýja fram úrslit. Byr var meiri í seglum Stjörnunnar í framlengingunni svo að sigurinn féll liðinu í skaut, 32:28.
Leikir dagsins
Olísdeild kvenna, undanúrslit, 2. umferð:
Ásvellir: Haukar – ÍBV (0:1), kl. 15 – sýndur á Stöð2sport.
TM-höllin: Stjarnan – Valur (1:0), kl. 16.40 – sýndur á Stöð2sport.
Umspil Olísdeildar karla, úrslit, 3. umferð:
Safamýri: Víkingur – Fjölnir (2:0), kl 14 – sýndur á Facebooksíðu Víkings.
Handbolti.is verður með textalýsingu.
