Áfram verður leikið í Olísdeildum karla og kvenna í dag. Afturelding sækir ÍBV heim í Olísdeild karla þar sem þriðja sæti deildarinnar verður undir. Aðeins munar einu stigi á liðunum, Aftureldingu í hag. ÍBV situr í fjórða sæti með 18 stig en hefur til þessa sjaldnar leikið en önnur lið deildarinnar. Takist Eyjamönnum að vinna leikinn fara þeir upp í þriðja sæti og verða aðeins stigi á eftir FH sem situr í öðru sæti. Þar á ofan á ÍBV leik inni á FH-inga.
Ef Afturelding nær að vinna leikinn í Eyjum, líkt og hún gerði í fyrri leiknum í Mosfellsbæ í lok okótber 31:26, fer liðið upp að hlið FH. FH sækir Hauka heim annað kvöld.
Mikið verður að gera í KA-heimilinu í dag. Handknattleiksfólk frá Selfossi gerir víðreist á Akureyri og mætir KA og KA/Þór í þremur leikjum í jafnmörgum deildin. Það verður svo sannarlega líflegt í KA-heimilinu frá morgni til kvölds enda ekki amalegt að fá fjölmennan hóp glaðbeittra Selfyssinga í heimsókn.
Afturelding getur náð tveggja stiga forskoti í Grill 66-deild kvenna takist liðinu að leggja ungmennalið Vals í Origohöllinni. Ungmennalið Vals hefur verið sýnd veiði en ekki gefin í síðustu leikjum og ómögulegt að segja hver raunin verður að þessu sinni.
Leikir dagsins
Olísdeild karla:
Vestmannaeyjar: ÍBV – Afturelding, kl. 14 – sýndur á Stöð2sport.
KA-heimilið: KA – Selfoss, kl. 17 – sýndur á Stöð2sport.
Staðan og næstu leikir í Olísdeildum.
Olísdeild kvenna:
KA-heimilið: KA/Þór – Selfoss, kl. 14.30 – sýndur gegn gjaldi: https://www.livey.events/ka-tv
Grill 66-deild kvenna:
Origohöllin: Valur U – Afturelding, kl. 16.30.
Staðan og næstu leikir í Grill 66-deildum.
Grill 66-deild karla:
KA-heimilið: KA U – Selfoss U, kl. 19.
