Úrslitakeppni Olísdeildar karla í handknattleik hefst í kvöld. Átta liða úrslit hefjast með tveimur leikjum, annarsvegar á heimavelli Vals þangað sem Framarar koma í heimsókn og hinsvegar þegar Stjörnumenn sækja Aftureldingu heim að Varmá. Leikurinn á Hlíðarenda hefst klukkan 18 en að Varmá klukkan 19.40.
Leikir kvöldsins verða sendir út á handboltapassanum en sá síðari í viðhafnarútsendingu Símans sem ætlar að senda út valda leiki úrslitakeppninnar í opinni dagskrá sem Kukl sér um að framleiða.
Síðari rimmur átta liða úrslita Olísdeildar karla hefjast annað kvöld þegar FH og KA mætast og ÍBV og Haukar leiða saman hesta sína.
Liðin sem fyrr vinna tvær viðureignir í rimmum átta liða úrslita öðlast sæti í undanúrslitum.
Úrslit í leikja liðanna í Olísdeild karla í vetur:
29. september: Valur – Fram 34:30.
6. febrúar: Fram – Valur 28:36.
5. október: Stjarnan – Afturelding 24:28.
15. febrúar: Afturelding – Stjarnan 32:26.
Olísdeild karla, 8-liða úrslit, 1. umferð:
N1-höllin: Valur – Fram, kl. 18.
Varmá: Afturelding – Stjarnan, kl. 19.40.
Handboltapassinn sendir út báða leiki. Einnig verður viðureign Aftureldingar og Stjörnunnar í opinni dagskrá í Sjónvarpi Símans.
