Ekki verður slegið slöku við í kvöld á handboltavöllum víða á höfuðborgarsvæðinu. Úrslitakeppni Olísdeildar karla heldur áfram. Einnig fer fram önnur umferð undanúrslit umspils um sæti í Olísdeild kvenna. Ekki ríkir síður spenna í keppni þeirra en í átta liða úrslitum Olísdeildar karla. Allir leikir kvöldsins hefjast stundvíslega klukkan 19.30.
Íslandsmeistarar Vals standa höllum fæti í rimmu sinni við Hauka um sæti í undanúrslitum. Haukar, sem höfnuðu í áttunda sæti. Haukar unnu fyrstu viðureignina við deildarmeistarana í Origohöllinni á sunnudaginn, 24:22. Þetta var fimmti tapleikur Vals í röð á Íslandsmótinu. Vinni Haukar á nýjan leik í kvöld taka þeir sæti í undanúrslitum. Ef Valur vinnur mætir hann Haukum í oddaleik í Origohöllinni á laugardaginn klukkan 16.
Fram er í svipuðum sporum og Valur. Ekkert annað en sigur kemur til greina í heimsókn liðsins til Aftureldingar á Varmá í kvöld. Mosfellingar unnu með þriggja marka mun, 33:30, í stórskemmtilegum framlengdum leik í Úlfarsárdal á sunnudaginn. Afturelding batt þar með enda á sex leikja sigurgöngu Fram liðsins í viðureignum liða félaganna.
Úrslitakeppni Olísdeild karla, 8-liða úrslit, önnur umferð:
Ásvellir: Haukar – Valur, kl. 19.30 (1:0) – sýndur á Stöð2sport.
Varmá: Afturelding – Fram, kl. 19.30 (1:0) – sýndur á Stöð2sport.
Umspil Olísdeildar kvenna
Grótta steinlá fyrir ÍR-ingum í fyrsta leik liðanna í undanúrslitum umspils Olísdeildar kvenna á sunnudaginn, 32:20. Hún verður að ná fram hefndum í kvöld til að fá annað tækifæri í undanúrslitum í oddaleik á laugardaginn í Skógarseli ÍR-inga.
FH-ingar eru einnig með bakið upp að vegg í viðureign sinni við Selfoss í hinni viðureign undanúslita eftir níu marka tap, 34:25, í Sethöllinni á sunnudaginn.
Umspil um sæti í Olísdeild kvenna, 1. umferð, 2. leikir:
Hertzhöllin: Grótta – ÍR, kl. 19.30 (0:1).
Kaplakriki: FH – Selfoss, kl. 19.30 (0:1).
