Elleftu umferð Olísdeildar karla lýkur í kvöld með þremur leikjum. Leikmenn ÍR og Hauka ríða á vaðið klukkan 18 í íþróttahúsinu í Austurbergi. Ef Haukar vinna leikinn endurheimta þeir efsta sæti deildarinnar af FH sem laumaðist upp í efsta sæti í gær eftir baráttusigur á ÍBV, 33:30, í Vestmannaeyjum.
Klukkan 19.30 leiða Selfoss og Grótta saman hesta sín í Hleðsluhöllinni á Selfossi. Tíu mínútum síðar mætast Valur og Afturelding í Origohöllinni.
Eins og fyrri daginn verður leikið fyrir luktum dyrum. Vonir eru hinsvegar bundnar við að þegar kemur fram í vikuna verði íþróttahúsin opnuð á ný fyrir áhorfendur. Heilbrigðisráðherra gaf í skyn í gær í samtölum við fjölmiðla að ekki væri útilokað að opnað yrði fyrir takmarkað aðgengi fólks að íþróttaviðburðum samkvæmt nýjum tillögum um tilslakanir á sóttvörnum sem kynntar verða á morgun.
Leikir kvöldsins – Olísdeild karla:
Austurberg: ÍR – Haukar, kl. 18 – sýndur á Stöð2Sport.
Hleðsluhöllin: Selfoss – Grótta, kl. 19.30 – sýndur á Selfosstv.
Origohöllin: Valur – Afturelding, kl. 19.40 – sýndur á Stöð2Sport.
Ekki verður leikið í öðrum deildum Íslandsmótsins í handknattleik í kvöld.
