Undanúrslit Olísdeildar karla í handknattleik hefjast í dag þegar ÍBV sækir FH heim í Kaplakrika. Leikurinn hefst klukkan 17.
Deildarmeistarar FH eiga harma að hefna eftir tap fyrir ÍBV í undanúrslitum á síðasta ári. Eyjamenn sópuðu þá FH úr leik, 3:0. Viðureignirnar voru reyndar jafnari en niðurstaða einvígisins gefur til kynna. ÍBV vann þá tvisvar í Kaplakrika, 31:27 og 31:29, og einu sinni í Eyjum, 31:29. Síðan hefur mikið vatn runnið til sjávar.
FH lagði KA í tveimur viðureignum í átta liða úrslitum á dögunum, 30:28 og 25:19. Á svipuðum tíma vann ÍBV lið Hauka í tvígang, 33:31, og 37:31.
Leikurinn í Kaplakrika verður sendur út í opinni dagskrá í sjónvarpi Símans en einnig á Handboltapassanum.
Leikir í dag
Olísdeild karla, undanúslit, 1. umferð:
Kaplakriki: FH – ÍBV, kl. 17.
Evrópubikarkeppni karla, undanúrslit karla, fyrri leikur:
N1-höllin: Valur – CS Minaur Baia Mare, kl. 19.30.
